ദൈവം കോപിക്കാൻ താമസമുള്ളവനാണെന്ന് ബൈബിൾ വ്യക്തമാക്കുന്നു

പരിപൂർണ്ണനായ ദൈവം കോപിക്കുന്നതിനാൽ, കോപത്തെക്കുറിച്ച് നമുക്ക് കുറ്റബോധം തോന്നേണ്ടതില്ല. നമ്മുടെ കോപം ദൈവകോപത്തിന് കാരണമാകുന്ന അതേ കരുതലുകളിൽ നിന്നാണോ വരുന്നത് എന്നതാണ് പ്രധാനം. നമ്മുടെ കോപത്തെ പരിശോധിക്കാനും കൈകാര്യം ചെയ്യാനും സഹായിക്കുന്ന ചില വഴികൾ ഇവിടെ കൊടുക്കുന്നു.

നിങ്ങളുടെ കോപത്തെക്കുറിച്ച് ദൈവത്തോട് പറയുക: ആദ്യ കാര്യങ്ങൾ ആദ്യം. നമുക്ക് കോപമുണ്ടായില്ലെന്ന് നടിക്കാനാവില്ല. നാമെല്ലാവരും കോപിക്കുന്നു. ആ കോപത്തെ നിരാശയെന്നോ പ്രകോപനമെന്നോ മുദ്രകുത്തി തള്ളിക്കളയരുത്. അത് കോപമാണെന്ന് സമ്മതിക്കുക. നാം നമ്മോടും ദൈവത്തോടും സത്യസന്ധരായിരിക്കണം. എന്തായാലും യാഥാർത്ഥ്യം അവനറിയാം (എബ്രാ. 4:12-13). അവൻ ആഴമായി നമ്മെക്കുറിച്ചു കരുതലുള്ളവനാണ് (1 പത്രൊസ് 5:7). അവനോട് തുറന്ന് സംസാരിക്കുകയും നമുക്ക് എന്താണ് തോന്നുന്നതെന്ന് അവനോട് പറയുകയും വേണം.

നിങ്ങളുടെ കോപം തെറ്റായിരിക്കുമ്പോൾ നിങ്ങൾ മാറാൻ ആഗ്രഹിക്കുന്നുവെന്ന് ദൈവത്തോട് പറയുക: മാനസാന്തരം എന്നാൽ എന്റെ സ്വന്ത വഴിയിൽ സഞ്ചരിക്കുന്നത് അവസാനിപ്പിച്ച് ദൈവത്തെ അനുസരിക്കുകയും പിന്തുടരുകയും ചെയ്യുക എന്നതാണ്. സ്വയ-കേന്ദ്രീകൃത കോപത്തോടെ നാം പ്രതികരിക്കുമ്പോൾ, അക്കാര്യം ദൈവത്തോട് നാം സമ്മതിക്കേണ്ടതുണ്ട്. നാം ഇതിനകം കണ്ടതുപോലെ, നമ്മുടെ കോപത്തിന്റെ പിന്നിലെ പ്രചോദനം പലപ്പോഴും, അവന്റെ കരുതലുകളും മറ്റുള്ളവരുടെ ആവശ്യങ്ങളും പിന്തുടരുന്നതിനുപകരം നമ്മെത്തന്നെ സേവിക്കാനും സംരക്ഷിക്കാനുമുള്ള നമ്മുടെ ദൃഢനിശ്ചയമാണ്. അതുകൊണ്ടാണ് നാം അവനോട് ക്ഷമ ചോദിക്കേണ്ടതും നമ്മെ കോപിപ്പിക്കുന്ന സാഹചര്യങ്ങളിൽ അവന്റെ നേതൃത്വം തേടേണ്ടതും.

നന്ദിപൂർവ്വം പറയട്ടെ, യേശുവിന്റെ മരണവും പുനരുത്ഥാനവും നിമിത്തം, നമ്മുടെ സ്വാർത്ഥ കോപത്തിന് ക്ഷമ ചോദിക്കുമ്പോൾ ദൈവം നമ്മോട് ക്ഷമിക്കുമെന്ന് നമുക്ക് ഉറപ്പുള്ളവരായിരിക്കാൻ കഴിയും. ദൈവത്തിന്റെ ക്ഷമയുടെ സ്വഭാവം നാം നന്നായി മനസ്സിലാക്കുകയും (നമ്മുടെ കോപത്തിന്റെയും കയ്‌പേറിയ വികാരങ്ങളുടെയും എല്ലാ പൊട്ടിത്തെറികൾക്കും ക്രിസ്തു വില നൽകിയിട്ടുണ്ട്), നമ്മുടെ ഉള്ളിൽ വസിക്കുന്ന അവന്റെ ആത്മാവിനാൽ നമ്മെ മാറ്റാൻ ദൈവത്തെ അനുവദിക്കുകയും ചെയ്യുമ്പോൾ മറ്റുള്ളവരോടും ക്ഷമിക്കാൻ ആഗ്രഹിക്കുന്നത് എളുപ്പവും സ്വാഭാവികവുമാകും.

നിങ്ങളുടെ കോപവിഷയത്തിൽ ദൈവത്തിലാശ്രയിക്കുക: നമ്മുടെ കോപം കൈകാര്യം ചെയ്യുന്നത് ദൈവവുമായുള്ള കേവലം ഒരു “ഒറ്റത്തവണ’’ ഉടമ്പടി അല്ല. നമ്മുടെ കോപം സ്വയ-കേന്ദ്രീകൃതമായതിൽ നിന്ന് ദൈവ-കേന്ദ്രീകൃതമായ ഒന്നിലേക്ക് മാറാൻ സഹായിക്കുന്നതിന് നാം എല്ലാ ദിവസവും ദൈവത്തിൽ ആശ്രയിക്കേണ്ടതുണ്ട്. ഇത് ഒറ്റരാത്രികൊണ്ട് സംഭവിക്കുകയില്ല. അതിന് സമയമെടുക്കും. എന്നാൽ ദൈവം നമ്മെ മനസ്സിലാക്കുകയും ഓരോ ചുവടിലും നമ്മോടൊപ്പമുണ്ടാകുമെന്ന് വാഗ്ദത്തം ചെയ്യുകയും ചെയ്യുന്നു.

ഈ മാറ്റത്തിന്റെ ഭാഗമായി നാം വേദനിപ്പിച്ചവരോട് അല്ലെങ്കിൽ നമ്മുടെ കോപത്താൽ തള്ളിമാറ്റിയവരോട് ക്ഷമി ചോദിക്കുന്നത് ഉൾപ്പെട്ടേക്കാം. ഇത് ചെയ്യാൻ ബുദ്ധിമുട്ടുള്ള കാര്യമാണ്, എന്നാൽ നമ്മുടെ സ്വയത്തെക്കാൾ ദൈവത്തിൽ ആശ്രയിക്കുന്നതിന്റെ ഒരു ഭാഗം കൂടിയാണിത്. നാം ദൈവത്തിന്റെ വകയാണെന്നും അവനിൽ വിശ്രമിക്കുകയാണെന്നും നമുക്ക് ഉറപ്പുണ്ടായിരിക്കുമ്പോൾ, മറ്റുള്ളവരിൽ നിന്ന് ഒളിച്ചിരിക്കുകയും നമ്മുടെ കോപത്തെ മറയാക്കുകയും ചെയ്യേണ്ട ആവശ്യമില്ല. പകരം, മറ്റുള്ളവരെ അകറ്റി നിർത്താതെ നമുക്ക് എളിമയുള്ളവരായിരിക്കാനും അവരെ കരുതാനും കഴിയും.

നിങ്ങളുടെ കോപം എങ്ങനെ പ്രകടിപ്പിക്കാമെന്ന കാര്യത്തിൽ ദൈവത്തിൽ ആശ്രയിക്കുക: ബൈബിൾ വായിക്കുന്നതിലൂടെയും അവനുമായി സംസാരിക്കുന്നതിലൂടെയും നാം അവനോടൊപ്പം സമയം ചെലവഴിക്കുമ്പോൾ, അവൻ നമ്മെ രൂപാന്തരപ്പെടുത്തുമെന്ന് ദൈവം വാഗ്ദത്തം ചെയ്യുന്നു (റോമർ 12:1-2). ഇതിനർത്ഥം, നമ്മുടെ കോപവും നമ്മുടെ സ്വഭാവത്തിന്റെ എല്ലാ ഭാഗങ്ങളും ദൈവത്തിന്റെ ഹൃദയത്തെ പ്രതിഫലിപ്പിക്കാൻ തുടങ്ങും എന്നാണ്. പാപത്തിനും അതിന്റെ ഫലങ്ങൾക്കും എതിരെ കോപിക്കുന്നതിൽ നാം അവനോട് ചേരും.

ക്രിസ്തു നമ്മിൽ ജീവിക്കുകയും നാം അവനെപ്പോലെയാകുകയും ചെയ്യുമ്പോൾ, നമ്മുടെ കോപം നമ്മുടെ അവകാശങ്ങൾ സംരക്ഷിക്കുന്നതിനോ മറ്റുള്ളവരെ താഴ്ത്തുന്നതിനോ കാരണമാകയില്ല, മറിച്ച് നമ്മെയും നമുക്ക് ചുറ്റുമുള്ളവരെയും സ്വാർത്ഥവും വേദനാജനകവുമായ ജീവിത തിരഞ്ഞെടുപ്പുകൾ ഉപേക്ഷിക്കാൻ സഹായിക്കുന്നു. ഈ ലോകത്തിന്റെ വേദനയോടുള്ള നമ്മുടെ കോപം, നാം കണ്ടുമുട്ടുന്നവരോട് യേശുവിനെയും അവൻ വാഗ്ദാനം ചെയ്യുന്ന പുതിയ ജീവിതത്തെയും കുറിച്ച് പറയാൻ നമ്മെ പ്രേരിപ്പിക്കുന്ന ഒരു ആത്മഭാരം നമ്മിൽ ഉളവാക്കും.

നിങ്ങൾക്കാവശ്യമായ സമയമെടുക്കുക: തന്റെ ജീവിതകാലത്ത് വളരെയധികം വേദന സഹിച്ച ദാവീദ് രാജാവ് പറഞ്ഞു, “നടുങ്ങുവിൻ (കോപിപ്പിൻ); പാപം ചെയ്യാതിരിപ്പിൻ; നിങ്ങളുടെ കിടക്കമേൽ ഹൃദയത്തിൽ ധ്യാനിച്ചു മൗനമായിരിപ്പിൻ’’ (സങ്കീർത്തനം 4:4). നമുക്ക് കോപം തോന്നുന്നുവെങ്കിൽ, ശരിയായ കാരണങ്ങളാലാണോ നാം കോപിക്കുന്നത് എന്നതിനെക്കുറിച്ച് ദൈവത്തോട് സംസാരിക്കാൻ സ്ഥലവും സമയവും ഉണ്ടാക്കേണ്ടതുണ്ട്. നാം വ്യക്തിപരമായി വ്രണപ്പെടുമ്പോൾ ഇത് പ്രത്യേകിച്ചും സത്യമാണ്. നമ്മെ ചീത്ത പറയുന്ന ഒരാളോട് തൽക്ഷണം പൊട്ടിത്തെറിക്കാനുള്ള സഹജവാസന ഒതുക്കിവയ്ക്കുന്നത് നമ്മെ വേദനിപ്പിക്കാനാരംഭിക്കും; എന്നാൽ നാം പിന്നീട് ഖേദിക്കേണ്ടിവരുന്ന എന്തെങ്കിലും ചെയ്യുന്നതിനു മുമ്പ്, നാം ആദ്യം ചെയ്യേണ്ട കാര്യം അത് വേഗത്തിൽ ദൈവസന്നിധിയിൽ കൊണ്ടുവരിക എന്നതാണ്.

മറ്റുള്ളവരെ എപ്പോൾ അഭിമുഖീകരിക്കണം, അവരോട് സ്‌നേഹത്തോടെ എന്നാൽ സത്യസന്ധമായി എങ്ങനെ സംസാരിക്കണം, മോശമായ പെരുമാറ്റം നേരിട്ടുവെന്ന് നമുക്ക് തോന്നുന്ന ഒരാളെ എങ്ങനെ പ്രതിരോധിക്കണം എന്നീ കാര്യങ്ങളെക്കുറിച്ച് കൃത്യമായ മാർഗ്ഗനിർദ്ദേശങ്ങളില്ല. അതുകൊണ്ടാണ് നാം നമ്മുടെ തോന്നലുകളെ മാത്രം ആശ്രയിക്കുന്നില്ലെന്ന് ഉറപ്പാക്കേണ്ടത്. നമ്മുടെ വികാരങ്ങൾ എളുപ്പത്തിൽ വഴിതെറ്റിപ്പോകാൻ സാധ്യതയുണ്ട്, അതിനാൽ ഓരോ സാഹചര്യത്തെയും വ്യക്തിയെയും പ്രാർത്ഥനയിൽ ദൈവസന്നിധിയിലേക്ക് കൊണ്ടുവരേണ്ടതുണ്ട്. “എല്ലാ മനുഷ്യരോടും സമാധാനത്തോടെ ജീവിക്കാനും’’ എല്ലാ “പ്രതികാരവും’’ ദൈവത്തിനു വിട്ടുകൊടുക്കാനും ബൈബിൾ നമ്മെ ഉത്സാഹിപ്പിക്കുന്നു (റോമ. 12:18-19). അവന്റെ പരിശുദ്ധാത്മാവിനാൽ നമ്മുടെ ഹൃദയങ്ങളെയും മനോഭാവങ്ങളെയും മാറ്റാൻ അവനിൽ ആശ്രയിച്ചുകൊണ്ട് നമുക്ക് അത് ചെയ്യാൻ കഴിയും.

നാം കോപിഷ്ഠരായി ദൈവസന്നിധിയിൽ വരുമ്പോൾ പ്രതിഫലനാത്മകമായ ചില ചോദ്യങ്ങൾ നമ്മോടുതന്നെ ചോദിക്കുന്നത് സഹായകമായേക്കാം: ഞാൻ ശരിക്കും എന്തിനെക്കുറിച്ചാണ് കോപിക്കുന്നത്? യേശുവിന്റെ കരുതലുകളും സ്‌നേഹവും രക്ഷയും ആളുകളെ കാണിക്കാൻ എന്റെ കോപം സഹായിക്കുന്നുണ്ടോ? ഞാൻ ഇതിനെക്കുറിച്ച് ആരോടെങ്കിലും സംസാരിക്കണോ അതോ ഈ വിഷയത്തിൽ ദൈവത്തിലാശ്രയിക്കണോ? എന്റെ കോപം മറ്റുള്ളവരെ വേദനിപ്പിക്കുന്നതാണോ അതോ സഹായിക്കുന്നതാണോ?

നമുക്ക് ചുറ്റുമുള്ളവരുമായി സമാധാനത്തോടെ ജീവിക്കുന്നതിനെക്കുറിച്ചും നമ്മുടെ കോപത്തെ കൈകാര്യം ചെയ്യുന്നതിനെക്കുറിച്ചും ഇനിയും ഒരുപാട് കാര്യങ്ങൾ പറയാൻ കഴിയും. discoveryseries.org-ൽ നിങ്ങൾക്ക് കൂടുതൽ ആഴത്തിലുള്ള ബൈബിൾ പഠനങ്ങൾ കണ്ടെത്താനാകും. നിങ്ങൾ കോപവുമായി മല്ലിടുകയാണെങ്കിൽ നിങ്ങളുടെ സഭാ നേതാക്കളുമായോ മറ്റ് ക്രിസ്തീയ സുഹൃത്തുക്കളുമായോ സംസാരിക്കുന്നതും പ്രധാനമാണ്. നമ്മുടെ പോരാട്ടങ്ങളെ നാം ഒറ്റയ്ക്ക് അഭിമുഖീകരിക്കാതെ, നമ്മെ യേശുവിനോടു സദൃശ്യനാക്കാൻ എല്ലാ ദിവസവും ദൈവത്തിൽ ആശ്രയിക്കുമ്പോൾ നമ്മോടൊപ്പം പ്രാർത്ഥിക്കാനും പ്രോത്സാഹിപ്പിക്കാനും സഹവിശ്വാസികൾ ഉണ്ടായിരിക്കേണ്ടത് അത്യാവശ്യമാണ്.