5. അവന്റെ വേലയിൽ അവനോടൊപ്പം ചേരുക

“ഞാൻ നിങ്ങളോടു കല്പിക്കുന്നതു ചെയ്താൽ നിങ്ങൾ എന്റെ സ്നേഹിതന്മാർ തന്നേ” (യോഹന്നാൻ 15:14) എന്ന യേശുവിന്റെ ഈ വാക്കുകളനുസരിച്ച് ജീവിക്കുവാൻ നമ്മിൽ പലരും പാടുപെടുന്നു, കാരണം, ആ അനുസരണം നമ്മുടെ സുഖത്തിലോ, സൗകര്യത്തിലോ അധിഷ്ടിതമല്ല മറിച്ച്, അവനുമായുള്ള നമ്മുടെ ഉടമ്പടി ബന്ധത്തിലാണ് (സങ്കീർത്തനം 25:14).

എന്നാൽ ഈ അനുസരണവും സൗഹൃദവും ഒരു പദവിയായി നാം കാണുകയാണെങ്കിലോ? അത് ദൈവത്തിന്റെ ആഗ്രഹങ്ങളും, നമുക്കുവേണ്ടിയുള്ള പദ്ധതികളും മനസ്സിലാക്കാനുള്ള ഒരു മാർഗ്ഗമായിത്തീരും (യോഹന്നാൻ 15:15). നിങ്ങൾ ഇഷ്‌ടപ്പെടുന്ന ഒരു പ്രവർത്തനത്തിൽ ഒരു സുഹൃത്തിനൊപ്പം സമയം ചെലവഴിക്കുന്നത് നിങ്ങൾക്ക് ആസ്വാദ്യകരമാണല്ലോ? അതുപോലെ, ദൈവവുമായുള്ള നമ്മുടെ സൗഹൃദത്തിന്റെ സന്തോഷം വളർത്തിയെടുക്കാൻ അവനോടൊപ്പം നടക്കുക, അവനുമായി പങ്കാളിയാകുക, അവനോടൊപ്പം നമ്മുടെ വേല ചെയ്യുക എന്നിവയേക്കാൾ മികച്ച മാർഗ്ഗമില്ല.

യേശുവിന്റെ ദൗത്യം വ്യക്തമാണ്: എല്ലാ മനുഷ്യരെയും ദൈവത്തിന്റെ അത്ഭുതകരമായ വെളിച്ചത്തിലേക്ക് ആകർഷിക്കുകയും നമ്മെ പിതാവിനോട് നിരപ്പിക്കുകയും ചെയ്യുക (2 കൊരിന്ത്യർ 5:18-20). അവന്റെ ദൗത്യം (മത്തായി 25:40) നാം ഏറ്റെടുക്കുമ്പോൾ നമുക്ക് സുഖകരമല്ലാത്ത ചില കാര്യങ്ങൾ ചെയ്യേണ്ടതായി വരും: ദൈവത്തിന്റെ ഹൃദയത്തോട് ഏറ്റവും അടുത്തിരിക്കുന്ന ആളുകളുമായി, അതായത്, ഹൃദയം നുറുങ്ങിയവരുമായി, സൗഹൃദം സ്ഥാപിക്കുക (സങ്കീർത്തനം 34:18), പാവപ്പെട്ടവരുമായി നമുക്കുള്ളത് പങ്കിടുക (സദൃശവാക്യങ്ങൾ 19:17), അല്ലെങ്കിൽ പാർശ്വവൽക്കരിക്കപ്പെട്ടവർക്ക് വേണ്ടി സംസാരിക്കുക (സദൃശവാക്യങ്ങൾ 31:8-9).

എന്നാൽ അങ്ങനെ ചെയ്യുന്നത് നമ്മോടുള്ള അവന്റെ കൃപയുടെ വ്യാപ്തി മനസ്സിലാക്കാൻ നമ്മെ സഹായിക്കുന്നു. അവൻ എത്ര പരിശുദ്ധനാണെന്നും, നാം എത്ര പാപികളും നിസ്സഹായരുമാണ് എന്നതും, രാജാധിരാജാവ് നമ്മോട് തന്റെ സ്നേഹവും സൗഹൃദവും കാണിക്കുവാൻ ആഗ്രഹിക്കുന്നു എന്നത് എത്ര അതിശയകരമാണ് എന്നതും അത് നമ്മെ ഓർമ്മിപ്പിക്കുന്നു. പ്രത്യാശയില്ലാത്തവരുടെ ഹൃദയങ്ങളിലേക്ക് നാം ദൈവത്തിന്റെ പ്രത്യാശ പകരുന്നതിലൂടെ ദൈവത്തിന്റെ ഉദാരമായ സ്നേഹപ്രകടനത്തിനുള്ള നന്ദി നമ്മുടെ ഉള്ളിൽ ജ്വലിപ്പിക്കുന്നു.

ബൈബിളിൽ നമുക്കുവേണ്ടിയുള്ള ദൈവത്തിന്റെ കരുതൽ കാണുകയും, അവനെ ഒരു സുഹൃത്തായി കാണുകയും ചെയ്യുമ്പോൾ, അവനുമായി നാം ബന്ധപ്പെടുന്ന രീതി മാറും—അവനിൽ നാം ആനന്ദിക്കും, അവനോട് നമ്മുടെ ഹൃദയത്തിലുള്ള ചിന്തകളും പദ്ധതികളും പങ്കിടാൻ നാം ആഗ്രഹിക്കും.