മേഘ കൊറിയര് തുറന്നപ്പോള്, അവളുടെ പ്രിയ സുഹൃത്തിന്റെ മടക്ക വിലാസം രേഖപ്പെടുത്തിയ ഒരു കവര് കണ്ടു. കുറച്ചു ദിവസങ്ങള്ക്കു മുമ്പ്, ആ സുഹൃത്തിനോട് ബന്ധം സംബന്ധിച്ച ഒരു പോരാട്ടത്തെക്കുറിച്ച് അവള് പറഞ്ഞിരുന്നു. ജിജ്ഞാസയോടെ അവള് പൊതി അഴിച്ചു, വര്ണ്ണാഭമായ മുത്തുകള് ലളിതമായ ചണച്ചരടില് കോര്ത്ത ഒരു മാലയായിരുന്നു അതിനുള്ളില്. അതിന്റെ കൂടെ ഒരു കാര്ഡും ഉണ്ടായിരുന്നു; അതിലിങ്ങനെ എഴുതിയിരുന്നു, ”ദൈവത്തിന്റെ വഴികള് തേടുക.” മാല കഴുത്തിലണിഞ്ഞുകൊണ്ടു മേഘ പുഞ്ചിരിച്ചു.
ജ്ഞാനപൂര്ണ്ണമായ വാക്കുകളുടെ ഒരു സമാഹാരമാണ് സദൃശവാക്യങ്ങളുടെ പുസ്തകം – പലതും, തന്റെ കാലഘട്ടത്തിലെ ഏറ്റവും ജ്ഞാനിയായ മനുഷ്യനായി പ്രശംസിക്കപ്പെട്ട ശലോമോന് ആണ് എഴുതിയത് (1 രാജാക്കന്മാര് 10:23). അതിന്റെ മുപ്പത്തിയൊന്ന് അധ്യായങ്ങളും ജ്ഞാനം ശ്രദ്ധിക്കാനും ഭോഷത്തം ഒഴിവാക്കാനും വായനക്കാരെ ആഹ്വാനം ചെയ്യുന്നു. സദൃശവാക്യങ്ങള് 1:7-ലെ പ്രധാന സന്ദേശത്തോടെയാണ് അതാരംഭിക്കുന്നത്: ‘യഹോവാഭക്തി ജ്ഞാനത്തിന്റെ ആരംഭമാകുന്നു.” ജ്ഞാനം – എപ്പോള് എന്തുചെയ്യണമെന്ന് അറിയുന്നത് – ദൈവത്തിന്റെ വഴികള് അന്വേഷിക്കുന്നതിലൂടെ ദൈവത്തെ ബഹുമാനിക്കുന്നതില് നിന്നാണ് ലഭിക്കുന്നത്. ആമുഖ വാക്യങ്ങളില് നാം വായിക്കുന്നു, ”മകനേ, അപ്പന്റെ പ്രബോധനം കേള്ക്കുക; അമ്മയുടെ ഉപദേശം ഉപേക്ഷിക്കുകയുമരുത്; അവ നിന്റെ ശിരസ്സിന് അലങ്കാരമാലയും നിന്റെ കഴുത്തിന് സരപ്പളിയും ആയിരിക്കും” ( വാ. 8-9).
മേഘയുടെ സ്നേഹിത, അവള്ക്കാവശ്യമായ ജ്ഞാനത്തിന്റെ ഉറവിടത്തിലേക്കാണ് അവളെ നയിച്ചത്: അതായത് ദൈവത്തിന്റെ വഴികള് അന്വേഷിക്കുക. അവളുടെ സമ്മാനം മേഘക്കാവശ്യമായ സഹായം എവിടെ കണ്ടെത്താമെന്നതിലേക്കു മേഘയുടെ ശ്രദ്ധയെ നയിച്ചു.
നാം ദൈവത്തെ ബഹുമാനിക്കുകയും അവിടുത്തെ വഴികള് അന്വേഷിക്കുകയും ചെയ്യുമ്പോള്, ജീവിതത്തില് നാം അഭിമുഖീകരിക്കുന്ന എല്ലാ കാര്യങ്ങളിലും ആവശ്യമായ ജ്ഞാനം നമുക്കു ലഭിക്കും. ഓരോ വിഷയത്തിനും.
നിങ്ങള്ക്കു ജ്ഞാനം ആവശ്യമുള്ളപ്പോള് നിങ്ങള് എവിടേക്കു പോകും? ദൈവം മാര്ഗ്ഗനിര്ദേശം നല്കുമ്പോള്, നിങ്ങളുടെ കഴുത്തില് അണിഞ്ഞ മാല പോലെ, അവിടുത്തെ വാക്കുകള് നിങ്ങള്ക്ക് എങ്ങനെ സൂക്ഷിക്കാന് കഴിയും?
ദൈവമേ, എനിക്കാവശ്യമുള്ള എല്ലാ ജ്ഞാനത്തിന്റെയും ഉറവിടം അങ്ങാണെന്ന് ദയവായി എന്നെ ഓര്മ്മിപ്പിക്കണമേ. ഞാന് എപ്പോഴും അത് അന്വേഷിക്കാനാഗ്രഹിക്കുന്നു.
സദൃശവാക്യങ്ങളുടെ പുസ്തകത്തെക്കുറിച്ച് കൂടുതലറിയാന് ChristianUniversity.org/Proverbs സന്ദര്ശിക്കുക.